Valentine's Day

Sa araw na ito ay ipinagdiriwang natin ang Valentine's Day. Isang araw para sa tinatawag nating puso na may misyong magmahal. At ang araw na ito ay hindi lamang para sa mga taong na sa isang commitment tulad ng mag - asawa o kaya naman ay may boyfriend o girlfriend. Ngunit ang araw na ding ito ay para sa mga taong nagmahal, nagsakripisyo at nagalay ng oras at buhay para sa iba. Dito natin makikita ang pagmamahal ng mga magulang sa anak gayundin ang anak sa magulang, narito din ang pagmamahal ng isang totoong kaibigan at higit sa lahat nandito din ang pagmamahal ng Diyos na siyang lumikha sa ating lahat at tumubos sa ating mga kasalanan. 

Pagmamahal, isang salitang may malalim na kahulugan ngunit simpleng larawan, at ang larawan nito ay ang puso. Isang puso na dapat magbukas upang magbigay ng pagmamahal sa iba at tumanggap ng pagpapakumbaba at pagpapatawad. Isang puso na dapat magbukas sa bawat habag na mararamdaman nito sa iba. At Isang puso na handang tanggapin ang plano ng Diyos, mahirap man o masaya! At sa araw na ito, tayong lahat ay pinapaalalahanan, na patuloy nawang umusbong ang ating pagmamahalan sa isa't isa, at ito ay isang dakilang utos mula sa Panginoon. Kaya naman, nawa ang bawat isa ay matutong magbigay ng pagmamahal lalu't higit sa mga nakasakit sa kanila.

Wag po tayong magpakainggit sa mga magkakaholding hands sa araw na ito, wag tayong mainggit sa mga nag - aI Love Yuhan sa araw na ito, wag tayong mainggit sa mga taong may kadate sa araw na ito, sapagkat makasama mo lamang ang iyong pamilya sa bahay at magsalo salo kayo, ito ay katumbas na ng isang date. Makapagpasalamat ka lang sa isang kaibigang totoo sa iyo, ito ay katumbas na ng matatamis na I Love You. At hawakan mo lamang ang sarili mong kamay, pagdikitan ang iyong mga palad, isang simbolo ng pananalangin, ito ay katumbas na ng mahigpit na hawak kamay, mas higit pa dito, sapagkat hawak mo ang palad ng Diyos. Amen.